万维百科粤语版

情節

情節包含一連串先後嘅事件,而情節當中嘅一件事件會引致跟住嘅事件(so...)。

情節粵拼cing4 zit3英文plot),又有叫做故事線storyline[1][2],係指一個故仔所包含嘅連串性事件,以及係呢啲事件之間嘅邏輯關連[3]:喺一個故仔當中,一件事件會引致下一件,跟住最後帶到去高潮同埋結局;而情節每一段係要有返噉上下重要嘅,當中每件事件會對跟住落嚟發生嘅事件產生具體嘅影響,先可以做到令讀者觀眾有興趣知道每一個情節入面發生乜嘢事[3]

根據德國小說家吉斯塔夫·菲里塔格(Gustav Freytag)嘅見解,一個故仔嘅情節分做五大橛[4]

  1. 解說(exposition):喺故仔開頭嗰陣,作者要用一啲相對濕碎嘅事件,向觀眾介紹故仔嘅角色背景設定、同主要衝突。
  2. 昇溫(rising action):主角面對某啲危機,引致接連嘅衝突,成個故仔進展,變得愈嚟愈複雜。
  3. 高潮(climax):故仔去到最高峰,發生咗一啲重大嘅事件,主角被迫要面對一個大敵人或者大難關,係成個故仔氣氛最緊張嘅部份。
  4. 降溫(falling action):高潮過咗,故仔慢落嚟,並且逐一噉解答一啲仲未解開嘅問題。
  5. 結局(resolution / denouement):故仔完結,角色完成佢哋嘅發展

奇幻小說哈利波特(Harry Potter)做例子說明:

  • 喺解說階段,故仔講主角哈利仔喺佢姨媽姨丈屋企生活嘅一日,故仔展示咗哈利仔嘅姨媽姨丈點樣用各種方法刻薄佢-例如哈利仔被迫要以樓梯底嘅空間做瞓覺房噉,令觀眾對在場嘅角色有咗基本嘅了解。
  • 喺昇溫階段,每一件事件都會涉及啲角色作出決策同行動,一件事件會引致跟住嘅事件發生,而角色同背景都可以因為重大嘅事件而起變化,例:黑魔王佛地魔嘅復活會令成個魔法世界嘅人提高警戒,而啲人提高警戒會影響霍格華茲魔法學校(背景設定嘅一部份)嘅佈置同氣氛-搞到啲人緊張咗、保安多咗等等。
  • 然後呢啲事件會引致成個故仔最大型嘅衝突,迫主角面對成個故仔入面最大嘅難關,例:佛地魔復活,佢為咗追尋黑暗力量(佛地魔嘅目的),而返咗去霍格華茲(目的引致嘅行動),同想保護身處霍格華茲嘅朋友(主角嘅目的)嘅主角哈利仔一決生死(目的引致嘅行動)。
  • 到咗降溫階段,最大嘅衝突終結,(好多時身心俱疲嘅)一眾角色收拾大衝突造成嘅破壞,同時佢哋嘅行為因為衝突而起咗變化(好多時係成長成更加成熟嘅人)。

... 等等。情節基本上係故仔嘅骨幹,所以情節嘅舖排同編寫喺敘事學(narratology;研究故仔嘅一個領域)上係一個重大課題[5][6]

定義

愛德華·摩根·福斯特嘅相;幅相係喺 1954 年影嘅。
睇埋:故仔

邏輯連貫性

根據英格蘭大小說家愛德華·摩根·福斯特(E. M. Forster)嘅諗法,情節包含一個故仔入面啲事件,同埋事件之間嘅因果關係:佢舉咗個例,話「國皇死咗,然後皇后死埋」係一個故仔,不過「國皇死咗,然後皇后因為傷心過度而死埋」就係一個情節-喺後者嗰串事件當中,兩件事彼此之間有因果關係[7][8][9]

舉個例說明,考慮以下呢個故仔[5]

  1. 王子攞住玻璃鞋,想搵返灰姑娘
  2. 灰姑娘嘅繼姐妹想試著玻璃鞋,但著唔落。
  3. 灰姑娘著得落玻璃鞋,所以王子搵得返佢。

用呢個例子嘅話,「情節」同「故仔」呢兩個唔同嘅概念可以噉樣想像:

  • 第一件事同第三件事之間有因果關係,而第二件事雖然能夠對故仔嘅角色作出一啲描述(灰姑娘嘅繼姐妹企圖呃王子,令讀者更加睇得出佢哋唔係好人),但並唔會直接影響成串事件嘅結果。因為噉,個情節-事件之間嘅因果關係-可以描述成 1 → 3,而個故仔-事件時間上嘅先後次序-可以描述成 1 → 2 → 3 [5][註 1]
  • 情節係故仔嘅一個重要組成部份,但非情節嘅事件對一個故仔嚟講可以好重要,例子有 1997 年嘅戲鐵達尼號(Titanic)當中女主角喺船頭放開雙手,好似飛緊噉嘅一幕,呢一幕查實只係「男女主角墜入愛河」嘅一個體現,唔會直接影響故仔打後嘅發展,但就令觀眾印象好深刻[10][11]

敘述時序

敘事學家認為,情節包埋事件俾讀者觀眾睇到嘅次序域托·史克洛夫斯基(Viktor Shklovsky)等嘅俄羅斯文學理論思想家指出,一個故仔可以分做兩部份-fabula俄文:фа́була)同 syuzhet(俄文:сюже́т),前者指故仔入面事件嘅發生時序(<a1, a2, a3, a4, a5, ..., an>,當中 ai 係時間上喺故仔世界發生嘅第 件事件),而後者指讀者觀眾睇嘅事件嘅時序(例:<a5, a1, a3>)。舉閃回事件(flashback)嚟做說明:想像一個噉樣嘅故仔,故仔世界發生咗五件事,而呢五件事按時間先後排(fabula)嘅話會係 <a1, a2, a3, a4, a5>,但個故仔開場讀者第一件見到嘅係 a2,然後 a3、a4 同 a5,喺 a4 過後,其中一個角色透露佢過去嘅經歷 a1(a1 係個閃回),作者用呢段經歷解釋點解呢個角色喺 a2 同 a3 當中會有某啲行為-即係話個故仔嘅 syuzhet 係 <a2, a3, a4, a1, a5>,後者係個故仔嘅情節嘅一部份,前者唔係[12]。而每當一個專業嘅人幫電影小說等嘅文化產品嘅故仔寫劇情大綱(plot summary)嗰陣,通常淨係會寫低對個故仔嘅邏輯連貫重要嘅事件,同埋會以 syuzhet 嘅次序(讀者觀眾會睇到嘅次序)描述故仔嘅事件[13]

情節結構

戲劇結構

內文: 戲劇結構

戲劇結構(dramatic structure)係指對故仔情節嘅結構嘅思考,最早源於古希臘哲學家阿里士多德(Aristotle)喺公元前 335 年寫嘅著作《詩學》(Poetics;希臘文:Περὶ ποιητικῆς)一書,喺呢本書入面,阿里士多德嘗試分析用劇作講故仔嘅做法同故仔嘅結構;近期啲嘅戲劇結構分析出名例子有 19 世紀德國小說家吉斯塔夫·菲里塔格(Gustav Freytag)所作嘅模型:菲里塔格分析咗多個文學作品同劇作,認為一個故仔嘅情節大致上可以分做五大橛。作家編劇等專業作故仔嘅人理應要對戲劇結構有一定嘅了解[14]

菲里塔格模型

吉斯塔夫·菲里塔格嘅理論嘅想像圖

菲里塔格將佢個模型建基於衝突(conflict)嘅概念:佢指出,故仔往往係基於唔同角色(尤其係主角對立角色)之間嘅衝突-邪惡嘅大魔王想用黑暗力量統治世界,主角勇者想保護世界和平等等[3];一開始嗰陣,讀者要對每個角色同佢哋嘅動機有基本嘅了解,然後每個角色嘅動機會引致佢哋做出某啲行為-魔王想令黑暗力量籠罩世界,而勇者想要驅除黑暗力量,呢兩個動機彼此互相對立,令勇者同魔王之間發生衝突;衝突會逐漸升溫,最後達致成個故仔最大型嘅衝突-魔王同勇者分別號召咗各自嘅人馬,打一場大戰。喺最大嘅衝突過後,勇者打低咗魔王,身心俱疲嘅一眾角色收拾大衝突造成嘅破壞。如果將呢個過程用一條線-y 軸大致代表故仔嘅緊張程度,而 x 軸代表時間-畫出嚟嘅話,會大致出一條向上升再下降嘅線[15][16]

菲里塔格嘅模型包含五大階段:

  1. 解說(exposition)係一個故仔嘅開端;喺呢個階段,個故仔需要做嘅嘢係引入主要嘅角色同背景設定,等讀者觀眾對每個主要角色以及個故仔設喺乜背景建立基本嘅了解,而好多時作者亦會喺呢度擺低一啲伏筆(foreshadowing)。例:一本奇幻小說嘅第一個章節,故仔講述主角哈利仔因為佢阿爸阿媽過咗身,所以寄住喺佢姨媽姨丈屋企;哈利仔嘅姨媽姨丈唔俾佢有獨立瞓覺房,而係用樓梯底嘅空間做哈利仔嘅瞓覺房,姨媽姨丈喺佢哋個仔德里打哈利仔嗰陣往往唔出聲,而且佢哋仲成日無端端鬧哈利仔-作者用各種嘅角色行為嚟間接話俾讀者知「哈利仔嘅姨媽姨丈好刻薄佢」,同時故仔啲背景事物-角色嘅名似英文名、佢哋講嘢嗰陣用嘅係英式英文、背景嗰度有提到倫敦... 等等-暗示咗俾讀者知呢班角色住喺倫敦,讀者睇完第一個章節之後就對角色同背景設定有咗基本嘅了解[17][18]
  2. 昇溫(rising action)係故仔嘅下一段;一般嚟講,解說界定咗主要嘅角色同佢哋嘅背景,然後昇溫階段通常會有突然嘅大事發生,打亂角色嘅人生,令角色開始(因為佢哋各自嘅目的)起衝突,帶動情節進展。例:第一章,姨媽淨係話哈利仔嘅阿爸阿媽係撞車死嘅,而且好唔願意同哈利仔講有關哈利仔阿媽嘅嘢,令唔少讀者都覺得哈利仔嘅阿爸阿媽查實唔係普通人(伏筆);第二章,哈利仔收到魔法學校送嚟嘅信,知道佢阿爸阿媽原來係魔法師,去過魔法學校返學(伏筆提示嘅嘢),而呢件事打亂嗮佢嘅人生-哈利仔本來諗住佢嘅人生好似姨媽姨丈講嘅噉,只會係平凡同冇出息。同時呢點又引起衝突-哈利仔想去魔法學校以及知多啲佢阿爸阿媽嘅嘢,佢姨媽唔鍾意,尤其佢姨媽不嬲都對魔法世界有偏見(唔鍾意自己嗰個識魔法嘅妹),而且哈利仔去魔法學校返學之後,識到朋友(好似係魔法學校嘅校長鄧不利多)又識到敵人,令成個故仔出現好多衝突嘅可能性[19]
  3. 高潮(climax)係衝突(同故仔嘅緊張程度)去到最高峰嘅階段,喺昇溫階段所出現嘅衝突最後引致成個故仔最大規模嘅難關,主角所重視珍惜嘅事物會受到極大嘅威脅,焗住要成長同變強嚟應對呢個困難。例:去到好多章之後,哈利仔同佢班新敵人嘅衝突引致佢同佢朋友去調查敵人做嘅嘢,而呢樣嘢又引致佢哋發現,佢哋其中一個敵人查實密謀緊幫曾經統治魔法世界嘅黑魔王佛地魔復活,而且呢個敵人距離成功達到自己目的相當接近,令哈利仔所珍惜嘅嘢-佢喺魔法學校識到嘅朋友-受到相當大嘅威脅,哈利仔焗住要去同呢個(力量相當強嘅)敵人戰鬥;喺呢場戰鬥當中,個敵人真係會嘗試攞哈利仔命,唔似得打前嘅衝突噉只係學生之間嘅鬥爭,所以呢場戰鬥係成個故仔入面最嚴重嘅衝突[20]
  4. 降溫(falling action)係高潮過後嘅階段,通常會明顯短過昇溫階段,指大衝突過後,主角同生還嘅角色身心俱疲,並且收拾大衝突造成嘅破壞。例:哈利仔經過一輪困難之後成功打低咗敵人,阻止佛地魔復活,不過最後佛地魔係雖然復活失敗但走甩咗(呢點係為打後嘅小說埋下嘅伏筆,暗示佛地魔會再嘗試復活);而哈利仔回復體力之後,同校長鄧不利多坐低傾咗一輪,鄧不利多同其他角色嘅對話向讀者解釋一啲個故仔之前未解釋清楚嘅細節,哈利仔因為呢場大戰鬥而覺得好攰,但又由呢次衝突當中學得勇敢咗[21]
  5. 結局(resolution)總括成個故仔,要向讀者觀眾展示主要角色喺經歷咗呢次事件之後有乜嘢成長。例:學期完結,哈利仔要返去姨媽姨丈屋企過暑假,不過佢經已學得勇敢咗,仲夠膽喺佢表哥德里嘗試蝦佢嗰陣開玩笑噉威脅要向德里落咒,嚇到德里唔敢對佢郁手郁腳-哈利仔嘅人生起咗變化[22][23]

子情節

內文: 子情節

一個故仔嘅成段情節好多時會由多段子情節(subplot)組成,尤其係比較長同複雜嘅情節:一個故仔嘅角色往往會好似現實世界嘅人噉樣,同時追求緊好幾個唔同嘅目的;呢點表示,是但攞一個角色嚟睇,情節當中嘅一件大事有可能會同時影響佢嘅幾個目的,即係同時影響好幾個子情節[24][25][26]

莎翁嘅明著羅密歐與朱麗葉(Romeo and Juliet)為例,羅密歐與朱麗葉成段情節起碼有兩段子情節-羅密歐同朱麗葉之間嘅戀情(子情節 A),以及佢哋兩個家族之間嘅仇恨(子情節 B)-兩件事同時發生,而且會互相影響;羅密歐同朱麗葉墜入愛河,但佢哋家族係世仇,佢哋屋企人冇可能會同意佢哋結婚(子情節 B 影響子情節 A),而同時兩個家族如果知道羅密歐同朱麗葉相愛實會好嬲,令緊張程度升級(子情節 A 影響子情節 B),兩個家族之間嘅衝突升級會引致一場大衝突,例如其中一方一怒之下殺咗另外嗰個家族嘅其中一個成員(一件大事),呢件事令兩個家族之間嘅仇恨升到最高點,同時亦都會搞到羅密歐同朱麗葉嘅處境變到更加惡劣(件大事同時影響兩個子情節)-子情節各自嘅發展同相互影響令個故仔變得更加錯綜複雜,又令故仔世界變得更加像真[26][27]

情節裝置

喺魔戒嘅故仔入面,魔戒係一件人人都想搶嘅物件,所以魔戒帶動咗情節嘅發展。
內文: 情節裝置

情節裝置(plot device)係敘事學上嘅概念,指一個存在嚟純粹用嚟帶動情節發展、維持情節流動或者解決情節當中嘅狀況嘅角色或者物件[28]。舉個簡單例子,想像有個奇幻故仔,講主角同佢嘅同伴嘗試追蹤一件如果攞到手,就會得到極大力量嘅法寶,同時,佢哋又要阻止一個邪惡魔王得到呢件法寶(魔王得到呢件法寶一定會用件法寶嘅力量做壞事),呢件法寶就係一個情節裝置-件法寶係主要角色嘅動機嘅重心,所以件法寶嘅移動會引致啲角色跟住移動,而呢股移動會帶領啲角色去完一個地方又去下一個,確保情節唔會企喺度唔郁[29]。情節裝置嘅使用係寫作上一個重大嘅課題[30]

常見嘅情節裝置有以下呢啲[31]

  • 麥高芬(MacGuffin)係指一件對情節或者角色動機嚟講必要嘅物件或者事件,但呢件物件或者事件本身嘅特質未必係咁重要(可以換做第樣物件,但功能不變),例如頭先提到,奇幻故仔常用嘅「威力無邊嘅法寶」就係一種常見嘅麥高芬,呢件「威力無邊嘅法寶」可以係一隻有魔法力量嘅戒指,但原則上,就算件法寶係一條有魔法力量嘅頸鏈或者一個有魔法力量嘅馬桶,情節嘅內容基本上都唔會點變[32]
  • 卓哥夫把槍(Chekhov's gun)喺敘事學上可以係指一樣喺情節早期出現,打後對情節有巨大影響嘅事物,例如喺情節早期主角由佢阿爺嗰度得到一件家傳之寶,主角開頭諗住件家傳之寶只係一件有象徵意義嘅飾物,但喺情節後期,主角同佢同伴先至知,呢件家傳之寶原來係一件「威力無邊嘅法寶」嘅最後一塊碎片,而魔王由主角手上攞走件家傳之寶,重新砌返件法寶出嚟,得到巨大嘅力量,令故仔踏入衝突嘅最高峰-呢件家傳之寶就係卓哥夫把槍嘅一個例子[33][34]
  • 紅鯡魚(red herring)係指引誘故仔角色同讀者諗錯嘢嘅一種情節裝置,一開始就吸引觀眾嘅注意力(唔似得卓哥夫把槍噉,一開始望落無關痛癢)。例如想像一個偵探故仔,主角同佢嘅最好朋友一齊負責查一單謀殺案,故仔早期有多條線索,指出角色 D 係犯人-D 有犯案動機又冇不在場證明等,令主角同佢朋友跟住去調查 D-D 令情節得以進展,但及後嘅調查發現,原來主角個朋友先至係殺人犯-喺呢個故仔當中,D 扮演咗紅鯡魚嘅角色,引導角色同讀者諗錯嘢[35]
  • 天外救星拉丁文:deus ex machina)係指故仔當中一個望落冇可能解決到嘅狀況突然噉由一個完全出乎意料同可能性低嘅事件解決。一個極端嘅例子如下:主角同佢嘅同伴俾邪惡魔王韞喺一個地牢入面,地牢嘅天花板有尖刺,而且天花板慢慢噉向下移,主角同佢嘅同伴冇計可施,只係有得等死(一個望落冇可能解決到嘅狀況)... 然後下一刻佢哋俾人傳送咗去一個椰林樹影、水清沙幼嘅沙灘,原來有一個故仔之前完全冇提過嘅神仙貪得意用魔法變佢哋去沙灘-呢個神仙就係佢哋嘅天外救星[36]。有好多作家都認為,天外救星係一種極低水平嘅寫作技法[37]

... 等等。

常見情節橋段

美女與野獸嘅圖畫;美女與野獸係一個典型嘅重生型情節。
睇埋:七大基本情節

喺 2004 年,英格蘭作家基斯道化·卜卡(Christopher Booker)出咗本書,書名係《七大基本情節》(The Seven Basic Plots)。喺呢本書入面,卜卡佢分析咗大量嘅文學同電影作品嘅情節並且指出,世上絕大多數故仔嘅情節都屬於七大類當中嘅其中一類(呢啲類別係情節性嘅橋段[38]。佢嘅諗法喺當時嘅西方文壇引起咗唔少人迴響,而且及後仲成日俾作家以及敘事學者攞嚟做參考[39][40]

卜卡所講及嘅情節類型如下[38]

  • 類一:克服怪獸(Overcoming the Monster);主角同佢同伴出發去打低一股威脅佢哋或者佢哋家園嘅力量。
    例:邪惡嘅大魔王嘗試用黑暗力量籠罩成個世界(包括主角嘅屋企),主角同佢同伴出發去打低大魔王。
  • 類二:白手起家(Rags to Riches);一個生活環境唔好嘅主角靠某啲才能得到巨大嘅成功(財富同權力等),然後做咗個錯誤決定搞到乜都冇,再努力攞返成功,並且由呢個過程當中學習。
    例:灰姑娘由俾繼姊妹哈嘅窮人變成得到王子青睞嘅公主,然後因為到咗午夜而焗住要變返做窮人,但跟住又搵返王子。
  • 類三:旅程(The Quest);主角同佢同伴出發去追尋一件物件或者去某個地方,喺中途會遇到各種嘅難關以及由難關當中成長。
    例:主角同佢嘅同伴為咗要摧毀一隻附有邪惡力量嘅魔戒而帶住魔戒出發去一個有能夠破壞任何魔法嘅神山,中途遇到多種危險,例如同想得到邪惡力量嘅人戰鬥,最後佢哋成功摧毀魔戒,為世界帶嚟和平。
  • 類四:出航後回歸(Voyage and Return);主角去到一個新世界,新世界嘅法則同佢所熟悉嘅生活完全唔同,呢點主角焗住要應變同遇上各種難關,最後透過克服困境成長為更成熟嘅人同返到屋企。
    例:主角因為神秘力量穿越時空,去到一個異世界,打後佢(哋)克服喺異世界遇到嘅難關並且成長,最後搵到一道可以俾佢(哋)返屋企嘅時空門。
  • 類六:悲劇(Tragedy);主角係一個有明顯缺點但心地唔壞嘅人,佢犯咗一個巨大嘅錯誤,而呢個錯誤最後導致佢嘅失敗;呢個主角正路會係讀者觀眾會少少同情嘅角色,佢嘅失敗會令讀者觀眾覺得佢慘。
    例:主角得到一股能夠隨意殺人嘅力量,佢用呢股力量私下懲罰一啲做咗壞事嘅人,但後嚟佢變得愈嚟愈偏激,仲開始傷害無辜嘅人,另一個角色出現並且打低佢;主角最後下場係死亡,但大家都知佢查實只係想改善呢個世界,所以或多或少有啲同情佢。

劇情大綱

劇情大綱(plot summary)係做寫作方面工作嘅人成日要寫嘅一樣嘢。一個劇情大綱會簡短噉總括一個作品(小說、電影、同芭蕾舞劇等)嘅情節,等做影評等工作嘅人或者讀者觀眾唔使睇個作品就能夠知道個作品大致上講乜嘢故仔。一個可能嘅做如下[41]

  1. 寫劇情大綱嘅人按菲里塔格嘅模型(睇上面)將段情節分做若干個橛,首先總括描述吓故仔嘅背景設定同啲角色,並且暗示一吓個故仔嘅主要衝突(解說);例:「後生嘅生意人阿力(簡單噉描述主角)搬屋去咗個新社區,遇到有神秘過去嘅有錢獨身漢加特斯伯(簡單噉描述另外一個主角)」。
  2. 界定解說後有乜嘢事件引致衝突發生(昇溫);例:「後嚟有一日主角發現,佢阿爸俾佢細佬謀殺咗(一件喺情節當中引起衝突嘅關鍵事件,呢件事件引起一啲不可變嘅後果)...」
  3. 講吓個故仔嘅高潮,高潮係指成個故仔入面最大最嚴重嘅衝突,大綱仲要描述吓高潮引致乜嘢後果;例:「羅密歐喺決鬥當中殺死咗朱麗葉嘅表哥,令兩個家族之間嘅仇恨升到頂點,羅密歐俾人流放,令羅密歐同朱麗葉嘅戀情陷入一個絕望嘅狀態」。
  4. 最後講吓降溫嘅情況係點,高潮引致嘅重大改變會令各角色嘅心境同情緒有所變化;例:「羅密歐俾人流放,(簡單嚟講)朱麗葉知道自己冇乜可能可以同羅密歐喺埋一齊,傷心過度而自殺,而羅密歐得知朱麗葉死咗,就跟住自殺;一對後生戀人嘅死令到兩個家族好傷心,並且發誓以後都唔再互相仇視」[42]

睇埋

註釋

  1. 唔同版本嘅灰故娘情節都有啲唔同。例如喺某啲版本嘅灰姑娘入面,因為灰姑娘嘅繼姐妹爭住試玻璃鞋,引致灰姑娘聽到佢哋嗌交嘅聲而走出嚟,見到王子。喺呢個情況下,第二件事件就算係情節嘅一部份。

參考文獻

  • Freytag, Gustav (1900) [Copyright 1894], Freytag's Technique of the Drama, An Exposition of Dramatic Composition and Art by Dr. Gustav Freytag: An Authorized Translation From the Sixth German Edition by Elias J. MacEwan, M.A. (3rd ed.), Chicago: Scott, Foresman and Company, LCCN 13-283.
  • Foster-Harris (1960). The Basic Formulas of Fiction. Norman, OK: University of Oklahoma Press. ASIN B0007ITQBY.
  • Mack, Maynard; Knox, Bernard M. W.; McGaillard, John C.; et al., eds. (1985), The Norton Anthology of World Masterpieces, 1 (5th ed.), New York: W. W. Norton & Company, ISBN 0-393-95432-3
  • Obstfeld, Raymond (2002). Fiction First Aid: Instant Remedies for Novels, Stories and Scripts. Cincinnati, OH: Writer's Digest Books. ISBN 1-58297-117-X.
  • Polking, K (1990). Writing A to Z. Cincinnati, OH: Writer's Digest Books. ISBN 0-89879-435-8.

  1. Random House Dictionary. "plot."
  2. Oxford Dictionaries. "storyline."
  3. 3.0 3.1 3.2 Freytag, Gustav (1900) [Copyright 1894], Freytag's Technique of the Drama, An Exposition of Dramatic Composition and Art by Dr. Gustav Freytag: An Authorized Translation From the Sixth German Edition by Elias J. MacEwan, M.A. (3rd ed.), Chicago: Scott, Foresman and Company.
  4. Freytag, G. (1896). Freytag's technique of the drama: an exposition of dramatic composition and art. Scholarly Press.
  5. 5.0 5.1 5.2 Ansen Dibell, Ph.D. (1999-07-15). Plot. Elements of Fiction Writing. Writer's Digest Books. pp. 5 f. ISBN 978-0-89879-946-0. Plot is built of significant events in a given story – significant because they have important consequences. Taking a shower isn't necessarily plot... Let's call them incidents ... Plot is the things characters do, feel, think or say, that make a difference to what comes afterward.
  6. Plot. Literary Terms
  7. Prince, Gerald (2003-12-01). A Dictionary of Narratology (Revised ed.). University of Nebraska Press. p. 73.
  8. Wales, Katie (2011-05-19). A Dictionary of Stylistics. Longman Linguistics (3 ed.). Routledge. p. 320.
  9. Forster, E.M. Aspects of the Novel. Mariner Books. (1956).
  10. Teri Shaffer Yamada, Ph.D. "Elements of Fiction". California State University, Long Beach.
  11. Steve Alcorn. "Know the Difference Between Plot and Story". Tejix.
  12. Shklovsky, Viktor. (1917/1965). Art as Technique in L T Lemon and M Reis, eds., (1965) Russian Formalist Criticism. University of Nebraska Press.
  13. How to Write a Plot Summary.
  14. Northrup Frye, The Great Code (New York: Harcourt Brace Jovanovich, 1982, 1981).
  15. Freytag’s Pyramid: Seven parts and their sum total.
  16. Cohn, N. (2013). Visual narrative structure. Cognitive science, 37(3), 413-452.
  17. Freytag (1900, pp. 115–121).
  18. Foreshadowing / Harry Potter and the Philosopher's Stone. TV Tropes.
  19. Freytag (1900, pp. 125–128).
  20. Freytag (1900, pp. 128–130).
  21. Freytag (1900, pp. 133–135).
  22. Goatly, A. (2004). Corpus linguistics, systemic functional grammar and literary meaning: A critical analysis of Harry Potter and the Philosopher’s Stone. Ilha do Desterro A Journal of English Language, Literatures in English and Cultural Studies, (46), 115-154.
  23. Fenske, C. (2008). Muggles, monsters and magicians: A literary analysis of the Harry Potter series (Vol. 2). Peter Lang.
  24. Dickerson, A. I. (1976). The Subplot of the Messenger in" Athelston". Papers on Language and Literature, 12(2), 115.
  25. Canuteson, J. (1969). The Theme of Forgiveness in the Plot and Subplot of" A Woman Killed with Kindness". Renaissance Drama, 2, 123-141.
  26. 26.0 26.1 Subplot. Literary Devices.
  27. Draper, John W. (1939). "Shakespeare's 'Star-Crossed Lovers'". Review of English Studies. os-XV (57): 16–34.
  28. So What Exactly Is a Plot Device Anyway?. The Writing Cooperative.
  29. Artifact of Doom. TV Tropes
  30. Caracciolo, M. (2019). Form, Science, and Narrative in the Anthropocene. Narrative, 27(3), 270-289.
  31. Plot devices and how to use them. Writers Online.
  32. Wiliam, D. (1997, September). Relevance as MacGuffin in mathematics education. In British Educational Research Association Conference, York, September 1997.
  33. Valentine T. Bill (1987), Chekhov: The Silent Voice of Freedom, Philosophical Library.
  34. Chekhov's Gun. TV Tropes.
  35. Niazi, Nozar (2010). How To Study Literature: Stylistic And Pragmatic Approaches. PHI Learning Pvt. Ltd. p. 142.
  36. "Deus ex machina". Encyclopaedia Britannica.
  37. Handley, Miriam (January 1999). "Shaw's response to the deus ex machina: From the Quintessence of Ibsenism to Heartbreak House". Theatre: Ancient & Modern, January 1999 Conference.
  38. 38.0 38.1 Booker, C. (2004). The seven basic plots: Why we tell stories. A&C Black.
  39. The Seven Basic Plots. TV Tropes
  40. Gervás, P., León, C., & Méndez, G. (2015). Schemas for narrative generation mined from existing descriptions of plot. In 6th Workshop on Computational Models of Narrative (CMN 2015). Schloss Dagstuhl-Leibniz-Zentrum fuer Informatik.
  41. How to Write a Plot Summary.
  42. Steven Espinoza; Kathleen Fernandez-Vander Kaay; Chris Vandar Kaay (20 August 2019). We All Know How This Ends: The Big Book of Movie Plots. Laurence King Publishing.


本页面最后更新于2020-02-13 04:16,点击更新本页查看原网页

本站的所有资料包括但不限于文字、图片等全部转载于维基百科(wikipedia.org),遵循 维基百科:CC BY-SA 3.0协议

万维百科为维基百科爱好者建立的公益网站,旨在为中国大陆网民提供优质内容,因此对部分内容进行改编以符合中国大陆政策,如果您不接受,可以直接访问维基百科官方网站


顶部

如果本页面有数学、化学、物理等公式未正确显示,请使用火狐或者Safari浏览器