粵切字

粵切字（粵拼：jyut⁶ cit³ zi⁶；粵切字：央乙ﾞ·此必`·止子ﾞ；英語：Jyutcitzi）係一套粵文書寫方案，用拼音方塊字嘅方式寫粵語，粵語 19 個聲母同 56 個韻母各有符號代表^[1]，而聲調就用類似注音符號（Zhuyin Fuhao）同假名嘅濁點（だくてん）噉係隻字嘅右上角用各種嘅點（'、ˊ、ˋ、"、˝、 ﾞ）嚟表示^[2]。

運作原則

反切為基本運作原則

粵切字嘅基本運作原則就係反切。《說文》範例：東為得紅切，即東（dung¹）為得（daak¹）紅（hung⁴）。粵切字用同樣嘅原理，聲母字取聲母，韻母字取韻母，繼而組合裝嵌成為一個字符。唔同傳統反切嘅有三點：一、粵切字嘅字符係重新選擇出嚟，並唔依照過往嘅傳統韻書，所以粵切字所揀嘅字符同《廣韻》或者《集韻》無關；二、粵切字唔似傳統反切咁標埋聲調嘅，粵切字唔依靠上字下字去運算出個字嘅聲調係咩嘢，反而依靠右上角用各種嘅點嚟表示；三、粵切字有組裝規則，下面就可以睇到。

以粵拼為音系基礎

粵切字嘅奠基音系同埋符號系統，乃粵語拼音，則「粵拼」。

聲母決定切字結構

聲母決定切字結構，韻母對號入座。如「香港」（hoeng¹ gong²）一詞，h 為「亾」，係左右結構，故此聲母 oeng「丈」就放喺右邊。gong²，g 為「丩」，亦都係左右結構，故此聲母 ong「王」 亦係放喺右邊。按此，「香港」就理應寫作為「⿰亾丈⿰丩王」，唔組裝書寫嘅話就係「亾丈．丩王」（．唔係粵切字嘅書寫符，只不過係未組裝粵切字嘅閱讀輔助符號）。

聲母

b 比 ⿱	p 并 ⿰	m 文 ⿱	f 夫 ⿰
d 大 ⿱	t 天 ⿱	n 乃 ⿰	l 力 ⿰
z 止 ⿰	c 此 ⿱	s 厶 ⿱	j 央 ⿰
g 丩 ⿰	k 臼 ⿱	h 亾 ⿰	ng ⿰〤〤 * ⿱
gw 古 ⿰	kw 夸 ⿰	w 禾 ⿱
m/ng 𠄡**	m 𠄡.	ng 𠄡`

^*「〤〤」係「爻」（粵拼： ngaau⁴ ）嘅打橫。可以用「爻」嚟做未裝嵌嘅粵切字部件。

^** 「𠄡」係「五」嘅異體字。

韻母

	#	i	u	m	n	ng	p	t	k
/aa/	aa 乍	aai 介	aau 丂	aam 彡	aan 万	aang 生	aap 甲	aat 压	aak 百
/a/		ai 兮	au 久	am 今	an 云	ang 亙	ap 十	at 乜	ak 仄
/e/	e 旡	ei 丌	eu 了	em 壬	en 円	eng 正	ep 夾	et 叐	ek 尺
/i/	i 子		iu 么	im 欠	in 千	ing 丁	ip 頁	it 必	ik 夕
/o/	o 个	oi 丐	ou 冇		on 干	ong 王		ot 匃	ok 乇
/u/	u 乎	ui 会			un 本	ung 工		ut 末	uk 玉
/oe/	oe ⿱㇒才*					oeng 丈			oek 勺
/eo/		eoi 句			eon 卂			oet 𥘅
/yu/	yu 仒				yun 元			yut 乙

^*電腦打唔到「⿱丿才」呢個部件，所以未組裝部件嗰陣時可以暫時用住「居」先。「⿱丿才」係「垂」嘅異體字。

複合聲母

複合聲母，即係有幾個聲母行頭，譬如「sk-」（「skip 堂」嘅「skip」），「sk-」爲「厶臼」，佢哋嘅粵切寫法就係𢬿啲聲母上下噉疊埋一齊，再放個聲母喺右邊。就好似「skip」就砌埋變「[⿱厶臼]頁」。介母當係合聲母處理，譬如「阿 siang」同「pyoi 口水」分別可以寫作爲「阿·⿰[⿱厶央]生」同「⿰[⿱并央]丐·口水」。

零聲母、零韻母

零聲母音，即係淨係得韻母嘅音，譬如「-aa」（「啊」）「-e」（「欸」）「-i」（「咦」）「-o」（「哦」）等等，或者零韻母音，譬如「s-」「p-」等，佢哋嘅粵切寫法就係喺個字符嘅上方加個「⺍」。譬如「c-」（「唓」呢個表示不屑嘅語音）就會寫做「⿱⺍此」；「-e」（「欸」呢個一般人口窒窒個陣就會口噏噏嘅音）就會寫作為「⿱⺍旡」。

聲調

	1/7	2	3/8	4	5	6/9
粵切字方案（第一版）	斈〡	斈〢	斈〣	斈〤	斈〥	斈〦
粵切字方案（第八版）	斈¯、斈- 或 斈'	斈´	斈`	斈= 或 斈"	斈˝	斈ﾞ 或 斈 ̏

粵切字初初設計嗰陣係用蘇州數目字嚟標音嘅。但係後期嘅版本就改咗標調嘅方法，主因係因爲蘇州數目字太掗埞，塞唔入方塊字個四方格入面。

聲調可標可不標

粵切字並唔強制標調。之所以係噉，有兩個原因：一、似乎粵語人缺乏精準辨調嘅能力。意思係，粵語人可以從一個而且亦依賴一個音嘅調嚟辨別語義，但係愛佢講得出個調嘅身份（即係第幾聲），或者個調同另外一個調有咩唔同，似乎好困難。二、唔強制標調，係為咗提升粵切字嘅自由度，噉樣標唔標調就變相成為埋一個傳遞資訊嘅手段。

配埋意符，生產形聲字

粵切字，有冇聲母嚊韻母都好，都可以加上意符。例如添加「電」意符嘅「WiFi」就變 [⿰申[⿱禾介]][⿱[⿰夫介]电]。同樣，加上「戈」意符嘅「attack」就變「[⿰[⿱⺍乍]戈][⿰[⿱天尺]戈]」。

有邊讀邊嘅原則

粵切字係唔需要倚靠教育局嚟推行嘅，可以直接喺坊間推行，因爲佢係基於大家已經喺漢字入面熟悉嘅有邊讀邊原則^[3]。對於以粵語為母語嘅人嚟講，粵切字有得「有邊讀邊」嘅結果就係大大噉減低咗學粵切字嘅難度。以下嘅聲母同韻母表就清清楚楚噉為啲冇一目瞭然嘅邊列出部件讀邊嘅由來。

聲母

	p	s	g	k	h	ng	kw	m/ng
部件	并	厶	丩	臼	亾	爻	夸	𠄡
𪐀聲母部件褦嘅字	拼、併、瓶	私	叫、糾	舅、舊	亾*	𢯎、淆	誇、跨	五

^*亾係香港大學學苑文章裏面為hea（he³）建議採用嘅字，本身唔係讀hea而係「亡」嘅異體。採用呢個除咗係因為得意之外，係因為其他 h 嘅字字型都唔夠好—唔係太多筆畫就係合體字。

韻母

	aa	aau	aam	aan	aat	ai	an
部件	乍	丂	彡	万	压	兮	云
𪐀韻母部件褦嘅字	咋、炸	巧、考	三、衫、參	萬	壓	兮hai4	雲
	e	ei	em	en	et	iu
部件	旡	丌	壬	円	叐	么
𪐀韻母部件褦嘅字	既、嘅	鼻、畀	任	円（えん）	坺	幺jiu1、吆jiu1
	o	oi	ot	ok
部件	个	丐	匃	乇
𪐀韻母部件褦嘅字	個	鈣	渴、喝	托、託
	oe	oek	eon	eot	yu
部件	居	勺	卂	𥘅（朮）	仒
𪐀韻母部件褦嘅字	鋸goe3、啹goe1	約	訊、迅	術、述	於

粵切字解決「有音無字」

粵切字嘅基本功能就係幫手解決「有音無字」呢個問題，即係通過用一種「頂住先」嘅精神嚟攞啲粵切字嚟寫住某隻冇漢字嘅粵語字詞或隻生僻粵字先。噉就帶嚟兩個好處：

1. 平民唔會因爲唔識某隻漢字嚊粵字點寫而放棄咗同唔寫成個詞語。
2. 平民唔使驚畀人批鬥話攞嚟頂住先嘅粵切字唔係正字嚊本字。

天然生成粵切字

粵切字嘅發明靈感嚟自於「娿哿」（o¹ go⁶）呢個詞語，其中嘅「哿」字嘅讀音係由「加」（gaa¹）同「可」（ho⁴）嚟組成，似乎係天然嘅漢字切音字。「你再嘈我就用藤條𢞵你」嘅「𢞵」字（fit¹，解「用藤條或其它棒條抽打」）就肯定係真嘅天然粵切字^[4]。

用反切呢個手段黎併砌組字，並唔係新嘢。布依文字、壯文、字喃、侗文、西夏文，都有反切字^[5]。

幾時先喺粵文用

粵切字可以令到粵文可以慢慢轉移到一種「漢字粵切字混用」嘅書寫秩序。

粵切字嘅爭拗

好多人對粵切字好有意見，覺得粵切字係重造拼音方塊字，喺度重新發明車轆，根本冇咩噉嘅需要。

字體同輸入法

粵切字呢家重未加入Unicode，所以呢家要裝有粵切字嘅字體同輸入法先至可以喺電腦寫粵切字。

網上寫粵切字

參考

• 粵切字方案（第八版本）
• 點睇「粵切字」？
• 粵字改革學會 Cantonese Script Reform Society
• 粵語式諺文　「粵切字」改革方案　解決有音無字

睇埋

• 粵字改革
• 吳語小字
• 粵語諺文
• 諺文
• 粵文

攷