万维百科粤语版

經濟學

跳去導覽 跳去搵嘢
香港維港嗰頭有好多商場,日日都有大量嘅貨同服務被生產、分配同消費-商人攞住貨同服務,消費者就攞住錢,買能夠滿足佢哋慾望嘅貨同服務。
東京築地市場有水產批發,都係經濟活動-好多人買海鮮,目的係滿足自己「想食海鮮」嘅慾望。
紐約證券交易所每日都做好多交易,都係經濟活動-有好多人買股票,用嚟滿足自己「想要將來有多啲錢使」嘅慾望。

經濟學粵拼ging1 zai3 hok6英文economics[1][2]希臘文οἰκονομία,「oikonomia」),廣東話日常有陣時會嗌「ji6 kon1」或者「ji6 kon6」,係社會科學嘅一個領域,專門研究貨品服務生產消費、同埋分配。經濟學嘅研究範疇包括個體人類嘅行為同互動,以至成個經濟體嘅運作,主要可以按照研究現象嘅規模分做兩大子領域:微觀經濟學(microeconomics)著重分析經濟體嘅基本組成元件同呢啲元件之間嘅互動-「基本元素」包括咗個人、家庭、公司、買家、同賣家呀噉;而宏觀經濟學(macroeconomics)會成個經濟體噉分析,研究一啲描述個經濟體嘅總體屬性嘅變數,好似係本地生產總值失業率通脹、同公共政策等等。呢啲微觀嘅物體同埋經濟體嘅宏觀屬性仲會互相影響,形成各種各樣嘅經濟現象[3][4]

經濟學唔淨只會客觀噉研究經濟現象,仲會思考一個經濟體點先係「理想」:經濟學有得細分做集中思考「經濟客觀睇係點」嘅實證經濟學(positive economics)同埋集中思考「經濟應該係點」嘅規範經濟學(normative economics);前者會嘗試理解經濟體跟從乜嘢法則運作,似一門科學,而後者就往往會運用前者嘅研究得出嘅結果,重視思考要點樣操作一個經濟體,先可以令個經濟體達到理想嘅狀態(「理想」係有少少主觀)。規範經濟學喺經濟政策嘅制定上扮演咗舉足輕重嘅角色[5][6]

經濟學研究既有理論性貢獻,又有實用價值[7][8]。經濟學同多數嘅社會科學比起上嚟精確好多,好多時會運用數學方程式描述、模擬、同預測所研究嘅現象。所以學術界喺 1968 年創立諾貝爾經濟學獎(Nobel Memorial Prize in Economic Sciences),承認經濟學係一門嚴謹嘅科學同表揚呢個領域對人類嘅貢獻[9]

定位

經濟學之父亞當史密夫嘅畫像;呢幅畫係喺 1800 年畫嘅。

歷史上嘅定義

現代嘅學界對「經濟學」有多個定義,當中有一啲反映學界對呢個領域嘅新認識,有啲反映咗唔同學派嘅見解[10][11]。經濟學之父蘇格蘭哲學家亞當史密夫(Adam Smith)將「政治經濟學」(political economy;嗰時啲人俾經濟學個名)呢個領域定義做「對國家財富嘅本質同起因嘅探討」(an inquiry into the nature and causes of the wealth of nations)噉解,詳細啲係:

英文原文:"a branch of the science of a statesman or legislator [with the twofold objectives of providing] a plentiful revenue or subsistence for the people ... [and] to supply the state or common-wealth with a revenue for the public services."[12]
粵文翻譯:(政治經濟學係)一門政治家或者立法者嘅科學分枝,(兩個目標係提供)充份嘅收入或者生活所需俾人民... 同埋供應收入俾個國家或者聯邦等佢做到公共服務。

但係亞當史密夫嘅見解唔完全受到當代嘅學者接納。喺 1803 年,法國經濟學家 Jean-Baptiste Say 嘗試將呢個領域由佢喺公共政策上嘅用途區分開,將個領域定義做「研究財富嘅生產、分配、同消費嘅科學」[13],而再後嚟少少嘅英國哲學家米爾(John Stuart Mill)喺 1844 年嘗試響一個社會層面定義經濟學:

英文原文:"The science which traces the laws of such of the phenomena of society as arise from the combined operations of mankind for the production of wealth, in so far as those phenomena are not modified by the pursuit of any other object."[14]
粵文翻譯:科學嘅一門,專係探究由人類生產財富嘅共同作業所構成嘅社會現象當中嘅法則,只要呢啲現象冇受(人類)對任何第啲嘢嘅追求干擾。

打後喺 1890 年,經濟學家 Alfred Marshall 喺佢嗰本教科書《經濟學原則》(Principles of Economics)入面提出咗一個到咗家吓仲有好多人用嘅定義,將經濟學嘅分析擴展到唔淨指包含財富,以及由社會去到微觀經濟層面:

英文原文:"Economics is a study of man in the ordinary business of life. It enquires how he gets his income and how he uses it. Thus, it is on the one side, the study of wealth and on the other and more important side, a part of the study of man."[15]
粵文翻譯:經濟係喺生活嘅普通事宜嗰度對人嘅研究。佢(經濟學)探討個人點樣得到佢嘅收入同埋佢點樣用佢嘅收入。所以,佢(經濟學)一方面係對財富嘅研究,而喺另一個(更加緊要嘅)方面,係對人嘅研究嘅一部份。

廿世紀嘅定義

而喺 1932 年,英國經濟學家里奧勞·羅賓斯(Lionel Robbins)諗出咗一個俾人譽為「可能係而家最廣受人接納」嘅定義[11][16][17]

英文原文:"Economics is a science which studies human behaviour as a relationship between ends and scarce means which have alternative uses."[18]
粵文翻譯:經濟學係一門科學,專門研究人類行為,視人類行為係目的(end)以及稀缺得嚟又有多種用途嘅手段(mean)之間嘅關係。

羅賓斯形容話呢個定義唔係分類性噉將某啲類型嘅行為揀出嚟話係經濟學嘅研究對象,而係分析性噉將每種行為嘅一部份揀出嚟研究-即係受到稀缺性所主宰嗰部份[19]。佢話佢之前嘅經濟學家通常都將研究嘅重點擺喺對財富嘅分析上,研究財富點樣俾人創造(生產)、分配、同消費,以及財富點樣增長[20],但係佢認為經濟學仲有得攞嚟研究第啲嘢,好似係打仗噉,因為打仗嘅各方通常都有一個共同嘅目的(要打贏)、涉及到成本同得益、而且會喺達到目的嘅過程當中會用資源(人命同財產等嘅損失)。如果喺一個局勢當中雙方都冇能力打贏或者成本高過得益好多嘅話,噉做決定嘅人(假設佢哋係理性嘅)永遠都唔會打仗(一個決定),而會嘗試用佢哋嘅資源去做第啲嘢。羅賓斯主張學界唔應該將經濟學界定為研究財富、戰爭、犯罪、教育、或者是但一樣可以用經濟學研究嘅嘢嘅科學領域,而係應該將經濟學界定為一個專門研究呢啲現象嘅某一樣共同部份-用有限嘅資源達到一啲目的-嘅領域[6][21]。不過要留意嘅係,雖然羅賓斯呢個定義喺經濟學界廣受接納,但都唔係冇人批評[16][22][23]

稀缺性

棒球係一種競爭性嘅運動;咁多隊球隊當中得一隊有得做冠軍-「冠軍位置」有稀缺性。
內文:稀缺性

稀缺性(scarcity)係經濟學最基礎嘅一個概念,佢指嘅係有限嘅資源同理論上無限嘅慾望(want)之間嘅差異:人類有好多慾望,但係就算有咗現代科技,佢哋手頭上嘅資源-錢、時間、精神-都硬係有限嘅,好多時佢哋都冇足夠嘅資源達到嗮佢哋想要達到嘅目的,例如一個人唔夠錢買嗮佢想要嘅嘢,唔夠時間做嗮佢想要做嘅嘢,又或者一間公司唔夠資源生產嗮佢想要生產嘅嘢。因為稀缺性嘅問題,人類需要做犧牲,需要放棄某啲嘢,嚟獲得更多佢想要嘅稀缺(scarce)嘅資源,亦都因為噉樣而有咗競爭,人同人之間會各自犧牲時間精神等嘅資源嚟爭稀缺嘅嘢。舉個例子說明,「人工高嘅工」係一種稀缺性嘅資源:好多人都想要賺多啲錢,所以會犧牲時間精神返工同搵人工高嘅工,而高人工嘅職位嘅數量少過想要呢啲職位嘅人嘅數量,所以啲人就要爭,佢哋會有誘因落力,犧牲更多時間同精神為求爭到嗰啲職位[24]:p. 105

世上有一啲資源係冇稀缺性嘅問題嘅,好似係空氣噉就係一個例子,空氣對於地球上嘅生命嚟講不可或缺,但係佢對人類嚟講唔具有稀缺性(雖然對於某啲生物嚟講可能有):一個正常嘅人類無時無刻一唞就唞到氣,唔使用啲乜嘢時間精神嚟令到自己有氣唞,而且目前地球上嘅空氣充足到不得了,夠嗮人類享用,所以人類根本冇誘因爭空氣-空氣呢種資源嘅量足夠滿足人對佢嘅需求,所以唔具有稀缺性[25][26]

稀缺性係經濟學嘅最根本概念。有好多資源都係稀缺嘅,所以人類要做好多決策,決定點樣運用某啲資源(時間、精神等等)去最大噉滿足自己嘅慾望:一個人會想用自己有限嘅收入滿足最多嘅慾望,好多時又會想要有多啲錢(等自己可以滿足多啲慾望),但係錢係有限嘅,所以人同人之間會爭錢、爭人工高嘅工;一間牟利公司會想用自己有限嘅人力賺最多嘅盈利,又會想要有多啲人力嚟賺多啲盈利,但係優秀人才嘅數量係有限嘅,所以公司同公司之間會爭人才;一個國家會想用自己有限嘅資源(自然資源同土地等)令自己最穩固,又會想要有多啲資源,而世上嘅資源係有限嘅,所以國家同國家會以外交甚至打仗嘅方式爭資源爭土地。呢啲競爭嘅過程迫使決策者要以最有效率嘅方式運用自己手上嘅資源-而「人類點樣運用手上資源,最有效率噉達到目的」正正就係經濟學研究嘅重心[24][27]

研究方法

內文:經濟學方法

當代經濟學係一門科學領域,目的係增加人類對經濟現象(稀缺性引起嘅現象)嘅了解。經濟學家會運用數學上嘅知識,利用微積分線性代數統計學博弈論、同電腦科學等領域嘅方法分析同模擬經濟現象。一個專業嘅經濟學家要或多或少噉識得用呢啲架生同埋了解當中嘅原理,而有啲經濟學家仲會專門研究呢啲架生點樣喺經濟學上應用[28]

理論

內文:經濟模型

主流經濟理論靠嘅係量化嘅經濟模型(economic model)。一個經濟模型會有若干個假設,並且由呢啲假設同已知嘅經濟學知識嗰度推導一個數學模型出嚟,目標係要用最少量嘅假設,做出最精確嘅預測同埋解釋最多嘅現象(即係科學哲學上所講嘅奧坎剃刀,第啲科學領域都會用呢條原則)。廿一世紀經濟學界主流嘅新古典經濟理論都跟實呢套準則,以建立能夠準確噉預測經濟現象嘅模型作為目標,令經濟學成為一門受人尊重嘅科學領域[29]

舉個簡單例子說明,以下係一個模擬一間公司利潤嘅經濟模型[30]