万维百科粤语版

美國警察

Jump to search

美國嘅警察系統,係美國聯邦嘅罪案司法體系入邊,三大主要分支組成之一,另外兩個係法院同懲教系統。雖然每個分支組成都係各自獨立運作嘅,三個部分喺埋一齊,就會組成咗由對罪案疑犯嘅調查到罪行懲處嘅管理嘅鏈條。

警察係管治體系度執法部門嘅基本構成,喺美國入邊有就成17,985個警察部門,包括咗城市警察局、縣(郡)警辦公室、州警/高速路巡警,仲有聯邦嘅執法部門。呢啲部門嘅執法作用係有:對疑似存在嘅罪行做調查,將調查結果轉介州或聯邦嘅檢控官,同喺司法工作展開前暫時扣留啲疑犯。而各層級嘅執法部門都有職責,去遏制罪行,同防範啲罪行嘅成功實施。其他啲職責,會包括服從同執行由法院發出嘅花令紙、手令或者其他指令。

警察部門同時仲要參與幾樣事務,譬如喺出現緊急情況同其他對公眾安全嘅威脅時候,係要率先響應執行職務;保護啲特定嘅公共設施同基建;維持公共秩序;保護公職人員;管理部分嘅拘留設施(通常係地方層面嘅)。

開初美國地方係冇職業嘅警隊,主要係由臨時召集嘅公民組成啲巡邏隊(patrol),去維持社會嘅秩序。1631年4月,波士頓市成立咗第一支警察組織——夜巡警,係義務兼職性質嘅,冇糧出。到1721年當地就第一個設立咗有薪警察。1789年華盛頓總統簽署咗命令,成立咗第一個聯邦執法部門——法警局。而喺1835年德薩斯州就成立咗第一個州警組織——德州巡邏騎警隊[1]。羅拔·卑利喺1829年創建咗倫敦警務處,標誌咗現代警務嘅誕生,美國各城市就跟著效仿返倫敦大都市警察制度,設立下轄嘅警察機構[2]

美國南方(蓄奴州份)嘅城市守衛隊(city guards),係喺1830年成立,前身係白人奴隸巡邏隊(slave patrols),目的在於監視同恐嚇城市入邊嘅黑人群體,同時會追捕走甩嘅奴隸,懲罰違規奴隸同打壓組織反抗嘅奴隸;北方出現嘅職業警隊(亦係白人男為主要成員),係隨著城市化嘅發展而發端,喺波士頓(1838年第一個成立咗市立警察部門)、紐約、芝加哥等地出現嘅市立警察部門,初頭係偏向咗打壓新移民、工會、少數族裔、低收入人士等,啲所謂嘅「社會唔穩定因素」、「危險低下階層」嘅「騷亂」[3]。喺1850年代芝加哥市政府成立咗警察局時,話過「城市發展必須要遏制密集人口入邊嘅唔穩定因素」。喺鍍金時代(1870年代~1900年),警察局就為咗啲作為市政府金主嘅企業主,去打壓啲工人運動。

最初階段度,啲警察局係受到咗市政府同選區領袖嘅控制,選拔警員嘅標準係以政治嘅忠誠度做主要條件,令到咗警隊係帶有好重嘅家族、族裔同兄弟會關係嘅特徵,啲警員由於未經訓練質素參差,針對弱勢群體嘅貪腐同暴力成為咗常態。由19世紀尾開始美國推行咗公務員改革(包括警隊嘅改革),入職考試同訓練一定程度係提升咗啲警察嘅質素。1920年代之後,啲改革者亦致力於修正貪腐、以權謀私、野蠻執法等問題,同盡力擺脫埋地方政治力量嘅影響。隨著1930年代汽車大規模生產同普及,警局開始用警車巡邏替代徒步巡邏,縮短咗出警嘅時間,提升專業化同高效率嘅改革目標。但呢陣警員嘅職業,仲係當成藍領工種,即係只要有強健身體嘅人都可以去做[2]

到1960年代,艾盧華雲(Earl Warren)擔任最高法院嘅首席大法官時候,繼續改革咗警隊啲問題,有幾個具里程碑意義嘅裁定,極大改變咗成個嘅調查執法程序,譬如1964年嘅Escobedo 訴 Illinois案,係裁定咗警察唔可以行刑逼供、疑犯有權喺審問時要求律師一齊出席;1966年嘅Miranda 訴 Arizona案,係要求警方喺逮捕疑犯嘅嗰刻,要向疑犯告知佢受憲法保護嘅權利(即依家鎖人時常見嘅「米蘭達警告」)[4]。而對於警員職業嘅深入專業化,例如對候選警員嘅學歷背景要求,警務專業培訓等,喺1970年代尾開始發展。到1990年代中期之後,聯邦撥出高達100億美金支援州同地方警局,做更多嘅警務改革,大中城市、細城鎮同鄉村嘅警務活動,都有覆蓋進行咗改革項目,以提升社區嘅警務質素[2]

總體規模

美國警察部門,包括有聯邦警察、州警、地方(市縣、鎮)警、校警、醫院警察、郵局警察、公園警察、機場警察、港口碼頭警察等,其中地方度嘅警察係佔咗絕對多數、州警排第二,聯邦層面同校警人數大致相當,醫院、郵局嘅就最少。根據勞工統計局(BLS)嘅統計,截至2014年5月,全國共有警員近64萬人,各個系統嘅警員人數如下[5]

地方政府:547,520人

州政府:59,030人

大學同職業學校:12,570人

聯邦行政部門:11,690人(唔包聯邦調查局、海關暨邊境保護局等執法機構)

中小學:3,310人

社區學院:2,770人

醫院:1,270人

郵局:460人

特點

聯邦同各州嘅警察,分別行使由聯邦同州所賦予嘅警察權力。而州入邊啲地方嘅警察權力,係由各州自行決定嘅,除咗聯邦警察外,州警、市警同郡警長仲有私人保安,同聯邦政府係冇任何嘅從屬上下關係,都係受地方政府嘅獨自管理嘅[6]。以行政分級係可以分聯邦警察、州警同地方警察三層,而各層級警察組織係各司其職,獨立運作同向對應自治區域嘅負責[7]。美國警察嘅主要任務係執行地方、州或聯邦法令,去保護民眾嘅生命同財產安全,大致係有三部分嘅職責組成:維持秩序、執法同埋服務民眾[5]

辨識

美國警察部門啲制服種類好多而且唔統一,大都係用金屬徽章做初步識別手段,會戴喺身度,徽章通常刻有同持有人相匹配嘅唯一識別冧巴。同時為咗更容易識別,唔少州都有法律限定,執法人員以外嘅人唔可以穿帶類似嘅金屬徽章。一般講郡縣警察部門頒發嘅徽章,係採用五、六或七角星嘅形式,而城市警察部門就採用盾牌嘅設計[8]

唔同嘅部門

聯邦警察

係司法部(U.S. Department of Justice, DOJ)同國土安全部(Department of Homeland Security, DHS)轄下嘅機構,仲有美國國會警察局(USCP)。其中國土安全部下轄嘅警察,通常稱之為檢查員(Inspector),而司法部嘅就係探員(Agent)[9]。聯邦機構嘅主要職能,係執行各聯邦法律,維持美國華盛頓特區嘅治安,仲有打擊全美入邊嘅重大罪行等[10]

州警

由各州政府設立嘅警察機構,一般只執行本州嘅法律,唔受聯邦嘅管轄同約束,而對各自嘅州長負責。成員一般有州騎警(State Troopers)或高速路巡警(Highway Patrol Officers),絕大部分州直接係叫騎警(Trooper),唯獨加州高速路巡警係叫State Traffic Officer。而第一個成立咗州警嘅德州,仲會叫騎警做游俠(Rangers)。另外仲有獄警(cooperationofficer,CO )[9]

騎警一般係喺地方警察管轄地之外執法,如州界公路嘅巡邏同處理交通意外等,所以啲州警嘅執法範圍唔係好大。州警局嘅局長大多由州長親自任命。

地方警察

一般地方層面嘅警察(Police Officer),係成個美國警察體系入邊最主要嘅組成。喺地方度,有著由縣(郡)政府同城市政府各自設立嘅警察機構,亦係互不從屬。其中屬於市政府嘅係警察局(Police Department, PD),而郡縣度嘅就係治安官署(Sheriff’s Department)或警長辦公室(Sheriff’s Office),有啲就仲搞多咗個郡警察局(County Police Department)。有啲大學或港口等個別場地,亦可以單獨設立警察局。市警察部門嘅警員係叫Police Officer或Officer,而縣警部門嘅警員就係叫Sheriff's Deputy或Deputy[11]。呢啲部門承擔咗絕大多數嘅治安維持,範圍包括轄區內嘅交通、治安、巡邏、調查等。

治安官

郡縣嘅治安官/縣警長(Sheriff),係源自中世紀英國徵稅官「shire reeve(郡長)」一詞,喺某啲州嘅治安官,仲係同樣擔負著收稅嘅工作,因為郡縣部門度唔夠人。治安官/縣警長係通過選舉產生嘅(羅德島同夏威夷兩州例外),並唔一定要係正規訓練嘅警務出身,係會有政黨背景同政務官嘅性質,會負責返郡縣入邊嘅執法工作。而一般由啲鎮民選出嘅鎮警(Marshal),就歸縣治安官嘅管理[12]。阿拉斯加州因當地冇郡(County)一級嘅建制,就冇治安官[9]

治安官相對其他嘅地方政府官員,會有更高嘅自主權。郡入邊尤細規模嘅地區,郡警長就會係集合咗罪案司法體系,三個唔同嘅職能於一身。大多州入邊嘅治安官,又屬於憲法官員(Constitutional Officer),係郡一級層面必須配備嘅角色,通常負責郡或市法庭度,保衛同押送任務嘅治安官或警察,會係叫法警(Bailiffs,而唔係Marshals)。治安官仲會負責向居民發送花令紙同傳票,同時大多數郡治安官機構仲要負責埋地方監獄嘅管理,有啲郡縣警長仲會兼任監獄長[10]

有啲郡縣政府為咗控制返當地治安官嘅權力範圍,就會再設立多返個郡警察局,部門首長受政府嘅控制,要向郡政府委員會報告同聽從郡政府嘅指令,而限制咗治安官嘅權力喺監獄(Jail)同訴訟程式事務(Legal Process)度。

市警局

城市嘅警察局局長,通常係由市政府或警察委員會任命嘅公務員,一般要求係要有正規專業訓練同履歷背景。城市警察嘅具體管理形式聯邦係冇劃一嘅規限,喺採用獨任市長制嘅城市,市警察局由市長負責,而採用議會制嘅城市,警察機構就由警察委員會負責。城市警察係美國公共服務機構入邊最龐大、最重要嘅組成部分。據估算受僱城市警察局嘅正規警員,佔咗全美正規警察總數嘅四分三[10]。全美唔同嘅城市警察局,由於制度唔一樣,各自啲機構規模同日常任務等都會有好大差異,而市警察局嘅內設機構亦會相差好多。而城市警員執法同服務範圍都會大過縣治安官,除咗巡邏、查案外,仲會處理日常市民遇到嘅一般社會問題[12]

警銜

內文: 美國警銜

參考

睇埋


本页面最后更新于2020-07-09 12:35,点击更新本页查看原网页

本站的所有资料包括但不限于文字、图片等全部转载于维基百科(wikipedia.org),遵循 维基百科:CC BY-SA 3.0协议

万维百科为维基百科爱好者建立的公益网站,旨在为中国大陆网民提供优质内容,因此对部分内容进行改编以符合中国大陆政策,如果您不接受,可以直接访问维基百科官方网站


顶部

如果本页面有数学、化学、物理等公式未正确显示,请使用火狐或者Safari浏览器