万维百科粤语版

雙人舞

2010 年一場胡桃夾子表演嘅雙人舞一幕

雙人舞粵拼soeng1 jan4 mou5英文pas de deux法文裏面「雙人步」噉解;法文讀音:[pɑ d(ə) dø])喺芭蕾舞上係指通常一男一女嘅兩位舞蹈員一齊跳嘅一段舞,係古典芭蕾舞當中芭蕾舞劇不可或缺嘅一環:古典芭蕾舞劇嘅故仔實會有浪漫嘅成份,所以編舞師會想飾演男女主角嘅舞蹈員一齊跳一段段有浪漫氣氛嘅舞,表達男女主角墜入愛河嘅情節;而且由於古典芭蕾舞喺呢種環境下發展,令古典芭蕾舞入面有好多出名嘅舞步同技法-例如係涉及男舞蹈員捧起佢舞伴嘅魚衝式舞姿(fish dive)等-都係要有兩個人一齊跳先會做到嘅[1][2]

因為雙人舞嘅重要性,有唔少古典芭蕾舞老師都相當重視用雙人舞評估學生嘅進度。例如係源自俄羅斯華加諾娃教法(Vaganova method)就主張雙人舞可以展示嗮所有重要嘅芭蕾舞技法,所以跟呢種方法嘅學生好多時喺要畢業嗰陣會俾老師要求跳一場大雙人舞[3]

大雙人舞

一段大雙人舞係一段有結構嘅雙人舞,分做五大部份,起曲、大慢板、兩段獨舞(雙人舞嘅兩位舞蹈員一人一段)然後最後以終曲作結。呢五部份一定有一個主題,最常見嘅係代表男女主角兩個人之間嘅愛情,好多時會加入擁抱同錫咀等嘅動作嚟表達浪漫嘅劇情。喺廿一世紀嘅芭蕾舞當中,大雙人舞往往會係一齣芭蕾舞劇入面最引人注目嘅一部份,會由個芭蕾舞團嘅兩位首席舞蹈員負責跳[2][4]

起曲

起曲(entreé;法文讀音:[ɑ̃tʁe],法文入面「進場」噉解)係大雙人舞嘅起始,作為段舞嘅高潮嘅一個前戲。喺起曲嗰陣,舞蹈員會喺舞台上出場,初頭會以定格但表達到角色嘅姿勢企喺度,例如王子會企直,並且向作為佢舞伴嘅公主輕微鞠躬。視乎編舞,男女主角舞蹈員可能會同時進場,但又有可能分別先後進場。

大慢板

大慢板(adagio / adage,意大利文入面「慢慢嚟」噉解)係大雙人舞嘅第二部份,主要係用比較慢但優美嘅動作,為打後嘅高潮製造氣氛。喺大慢板當中,通常個女主角會做慢而且好考平衡力嘅舞步,同時由個肌肉力量強嘅男主角負責用捧住女主角或者將一隻手伸出嚟俾女主角掹住(男主角隻手變成咗一條虛擬嘅扶把)等嘅方法,支撐住女主角-呢個時候女主角會做嘅舞步往往會係一啲要求超人平衡力、冇男主角幫手撐住冇乜可能做得到嘅舞步,例如係角度極大嘅傾斜獨腳站立(arabesque penché;指抬起髀抬起嘅角度大到隻腳高過個頭嘅獨腳站立),又或者係女主角做一個獨腳站立、男主角一路俾隻手佢掹住一路圍住佢行圈,等女主角嘅腳喺空中劃過一條弧線[4]。喺呢個過程當中,女主角會追求慢同優雅,而男主角就會追求隱陣得嚟又保持從容不迫[2]

喺大慢板當中,男主角要做嘅嘢技法上相對簡單,例如「一路俾隻手女主角掹住、一路圍住女主角行若干個圈」並唔係乜嘢複雜嘅動作,但就往往會要求極強嘅肌肉力量,例如捧起女主角甚至乎一路捧住女主角一路行一段距離等,都要求男主角有一對強而有力嘅雙臂[5]

獨舞

雙人舞嘅下一部份係獨舞(variation),通常會係男主角做先,然後到女主角做:做完大慢板之後,兩位舞蹈員會分開,然後到佢做獨舞嗰陣,佢會企到舞台中間,成為注意力嘅中心;一般嚟講,獨舞嘅功用係要展示舞蹈員嘅身手,所以會有好多高難度嘅舞步,而且因為想同節奏慢嘅大慢板成對比而節奏會比較快,或者至少會有節奏快嘅部份;獨舞嘅另一個功用係用嚟展示角色嘅個性,例如係天鵝湖(Swan Lake)王子同黑天鵝跳嘅大雙人舞噉,黑天鵝因為係(向天鵝公主落咒,搞到佢變成天鵝嘅)邪惡魔法師羅夫巴特(Von Rothbart)嘅手下,係一個奸角,所以黑天鵝嘅雙人舞好多時會帶有攻擊性[4]

終曲

終曲(coda;意大利文讀音:[ˈkoːda])係一場大雙人舞嘅終結部份。一般嚟講,終曲會有大慢板同獨舞嗰陣出現過嘅舞步組合,作為成段大雙人舞嘅一個總結,會以快過大慢板嘅節奏做出大慢板會做嘅雙人舞步,將成段舞嘅氣氛帶到高潮,並且喺音樂嘅高峰之下完結[1]

歷史

大雙人舞嘅元素最早係喺 18 世紀早期出現嘅,當時有歌劇同芭蕾舞劇會喺開場嗰陣要一男一女嘅表演者一齊做同樣嘅舞步,有陣時係一路拖手一路做-而「一男一女舞蹈員一齊做同樣嘅舞步」呢家嘢到咗現代嘅芭蕾舞當中都仲見得到。喺及後嘅兩個世紀裏面,芭蕾舞嘅拍檔跳舞會進化成有更多戲劇性嘅內容,例如係喺 1717 年嘅芭蕾舞劇瑪斯同維納斯嘅愛情(The Loves of Mars and Venus)就涉及飾演打仗之神瑪斯嘅男舞蹈員同飾演愛神維納斯嘅女舞蹈員嘗試用舞蹈表達愛情[6]

到咗 18 世紀尾同 19 世紀頭,芭蕾舞開始發展出完全嘅浪漫雙人舞:跳雙人舞嘅男女舞蹈員會有親密嘅接觸,女舞蹈員會將佢隻手擺喺男舞蹈員嘅手上,用男舞蹈員嘅支撐力,用腳尖企(en pointe;指成隻腳淨係腳趾尖掂地,係極講求平衡力嘅舞步)嘅方式跳舞,而呢種做法令女舞蹈員可以跳輕飄飄嘅舞,喺當時嘅芭蕾舞界引起咗巨大嘅迴響(睇埋浪漫芭蕾舞[6]

到咗 19 世紀尾,莫里斯·珀蒂帕(Marius Petipa)等嘅大編舞師引進咗「大雙人舞」嘅概念,指出芭蕾舞劇嘅一幕可以用一男一女兩位舞蹈員一齊跳一段大嘅舞嚟做高潮,令到芭蕾舞界有咗一套有關大雙人舞嘅結構同固定做法,而呢種大雙人舞成為咗當時嘅芭蕾舞劇大作-好似係胡桃夾子(The Nutcracker)同睡美人(The Sleeping Beauty)等-基本上必有嘅部份。及後廿世紀嘅大雙人舞仲變得更加融入於齣劇嘅故仔當中[6]

雙人舞姿留影

睇埋

參考文獻

  • Richard Elis and Christine Du Boulay, Partnering - The fundamentals of pas de deux, Wyman and sons 1955
  • Anton Dolin, Pas de deux - The Art of Partnering, Dover Publications 1969
  • Charles R. Schroeder, Adagio, 1971 Regmar Publishing Co.
  • Kenneth Laws and Cynthia Harvey, Physics, Dance and the Pas de Deux, Schirmer books 1994
  • Nikolaij Serebrennikov, Marian Horosko, Pas De Deux: A Textbook on Partnering, University of Florida, 2000
  • Suki Schorer, On Balanchine Technique, Partnering section, p. 383, Knopf 1999, ISBN 0-679-45060-2.

  1. 1.0 1.1 Greskovic, Robert. Ballet 101: A Complete Guide to Learning and Loving the Ballet. pp. 194–195.
  2. 2.0 2.1 2.2 Dolin, A. (2005). Pas de Deux: The art of partnering. Courier Corporation.
  3. Agrippina, I., & Vaganova, A. (1969). Basic principles of classical ballet: Russian ballet technique. Courier Corporation.
  4. 4.0 4.1 4.2 OUR 5 FAVOURITE GRAND PAS DE DEUX.
  5. Kersley, Leo. A Dictionary of Ballet Terms.
  6. 6.0 6.1 6.2 Cohen, Selma Jean (2004). International Encyclopedia of Dance. Oxford University Press. pp. 105–108.


本页面最后更新于2020-02-13 00:40,点击更新本页查看原网页

本站的所有资料包括但不限于文字、图片等全部转载于维基百科(wikipedia.org),遵循 维基百科:CC BY-SA 3.0协议

万维百科为维基百科爱好者建立的公益网站,旨在为中国大陆网民提供优质内容,因此对部分内容进行改编以符合中国大陆政策,如果您不接受,可以直接访问维基百科官方网站


顶部

如果本页面有数学、化学、物理等公式未正确显示,请使用火狐或者Safari浏览器